नागपूर, (प्रतिनिधी) २६ एप्रिल - आफ्रिका आणि दक्षिण अमेरिकन देशांमध्ये प्रवास करणाऱ्या नागरिकांसाठी अत्यंत महत्त्वाची बातमी आहे. नागपूर येथील अखिल भारतीय आयुर्विज्ञान संस्थेत (AIIMS) 'पीतज्वर' (यलो फिव्हर) लसीकरण केंद्राचा गुरुवारी (२३ एप्रिल) रितसर प्रारंभ झाला. या केंद्रामुळे आता महाराष्ट्रासह मध्य प्रदेश आणि छत्तीसगडमधील प्रवाशांना नागपुरातच जागतिक दर्जाच्या लसीकरण सुविधेसह वैध प्रमाणपत्र मिळणे सोपे झाले आहे.
प्रवासासाठी लस का अनिवार्य?
पीतज्वर (Yellow Fever) हा एडीस डासांमार्फत पसरणारा विषाणूजन्य आजार आहे. भारतात हा आजार नसला तरी, आफ्रिका आणि दक्षिण अमेरिकेतील अनेक देशांमध्ये याचा मोठा प्रादुर्भाव आहे. त्यामुळे या देशांमध्ये जाणाऱ्या किंवा तिथून येणाऱ्या प्रवाशांसाठी ही लस घेणे आंतरराष्ट्रीय नियमांनुसार बंधनकारक आहे. या पार्श्वभूमीवर भारत सरकारच्या आरोग्य मंत्रालयाने एम्स नागपूरला अधिकृत केंद्र म्हणून मान्यता दिली आहे.
लसीकरणाची प्रक्रिया आणि वेळ:
नोंदणी: लसीकरणासाठी प्रथम गूगल फॉर्मवर नोंदणी करणे आवश्यक आहे. त्यानंतर ईमेल किंवा फोनद्वारे तारखेची माहिती दिली जाईल.
कधी: दर गुरुवारी सकाळी ९:०० ते दुपारी १२:३० या वेळेत (शासकीय सुट्ट्या वगळून).
ठिकाण: एम्स नागपूर, प्रौढ लसीकरण क्लिनिक, खोली क्र. २४, तळमजला (आयपीडी ब्लॉक).
फी: लसीकरण शुल्क ३०० रुपये आणि ओपीडी नोंदणी १० रुपये.
महत्त्वाच्या सूचना:
लसीकरणाच्या दिवशी प्रवाशांनी आपला पासपोर्ट आणि प्रवासाशी संबंधित वैद्यकीय कागदपत्रे सोबत आणणे अनिवार्य आहे. ही लस घेतल्यावर १० दिवसांनी तिचा प्रभाव सुरू होतो आणि तो आयुष्यभर टिकतो. लस दिल्यानंतर लाभार्थ्याला ३० मिनिटे देखरेखीखाली ठेवले जाते आणि त्यानंतरच आंतरराष्ट्रीय प्रवासासाठी ग्राह्य असलेले अधिकृत प्रमाणपत्र दिले जाते.
"मध्य भारतातील प्रतिबंधात्मक आरोग्य सेवा अधिक मजबूत करण्यासाठी हे एक महत्त्वाचे पाऊल आहे. यामुळे परदेशात जाणाऱ्या प्रवाशांचा प्रवास अधिक सुरक्षित होईल," असे एम्स नागपूरचे कार्यकारी संचालक डॉ. प्रशांत पी. जोशी यांनी उद्घाटन प्रसंगी नमूद केले.
या उद्घाटन प्रसंगी ए.पी.एच.ओ. नागपूरच्या डॉ. आराधना भार्गव आणि समुदाय वैद्यक विभागाचे प्रमुख डॉ. प्रदीप देशमुख उपस्थित होते.