मुंबई, (प्रतिनिधी) १६ एप्रिल - भारतीय आयुर्विमा महामंडळाने (LIC) बदलत्या विमा बाजारपेठेची गरज ओळखून आपल्या सेवांचे पूर्णपणे डिजिटलीकरण करण्याच्या दिशेने मोठे पाऊल उचलले आहे. केंद्रीय अर्थ मंत्रालयाचे सचिव एम. नागराजू (IAS) यांच्या हस्ते मुंबईत एलआयसीच्या 'मायएलआयसी' (MyLIC) आणि विक्री मध्यस्थांसाठी 'सुपर सेल्स साथी' या दोन नाविन्यपूर्ण मोबाईल ॲप्सचे अनावरण करण्यात आले.
ग्राहकांसाठी 'मायएलआयसी' ठरणार वरदान
एलआयसीच्या २६ कोटींहून अधिक पॉलिसीधारकांना आता एकाच प्लॅटफॉर्मवर सर्व सेवा मिळणार आहेत. 'मायएलआयसी' ॲपमुळे कागदपत्रांचे काम कमी होऊन ग्राहकांना ३६०-डिग्री डिजिटल अनुभव मिळेल. याद्वारे ग्राहक त्वरित प्रीमियम भरणे, पॉलिसीच्या लाभांचा मागोवा घेणे, पेपरलेस कर्ज मिळवणे आणि कालबाह्य झालेल्या पॉलिसी पुन्हा सुरू करणे यांसारखी कामे घरबसल्या करू शकतील. विशेष म्हणजे, नवीन पॉलिसी शोधणे आणि खरेदी करणे आता अधिक सोपे आणि सुरक्षित झाले आहे.
प्रतिनिधी होणार अधिक सक्षम
विक्री प्रतिनिधींसाठी तयार करण्यात आलेले 'सुपर सेल्स साथी' हे ॲप कृत्रिम बुद्धिमत्तेवर (AI) आधारित आहे. याद्वारे प्रतिनिधींना ग्राहकांच्या गरजा समजून घेणे, कामगिरीचे निरीक्षण करणे आणि डिजिटल विक्री साधनांचा वापर करणे सुलभ होईल. 'फॉलो-अप'साठी स्वयंचलित स्मरणपत्रे आणि रिअल-टाइम डेटा मिळाल्यामुळे प्रतिनिधींची कार्यक्षमता वाढणार आहे.
'डीआयव्हीई' (DIVE) उपक्रमाचा भाग
हे दोन्ही ॲप्स एलआयसीच्या 'डीआयव्हीई' (डिजिटल इनोव्हेशन अँड व्हॅल्यू एन्हांसमेंट) या डिजिटल ट्रान्सफॉर्मेशन प्लॅटफॉर्मचा भाग आहेत. विमा क्षेत्रात स्पर्धात्मक समानता टिकवून ठेवण्यासाठी आणि सेवेची गुणवत्ता सुधारण्यासाठी हे बदल अत्यंत महत्त्वाचे असल्याचे एलआयसी व्यवस्थापनाने म्हटले आहे.
या सोहळ्याला एलआयसीचे मुख्य कार्यकारी अधिकारी आर. दोराईस्वामी, व्यवस्थापकीय संचालक दिनेश पंत, रत्नाकर पटनायक, आर. चंदर आणि वरिष्ठ अधिकारी उपस्थित होते.
?s=20