नाशिक, (प्रतिनिधी) ८ एप्रिल - दैवी शक्तीचा बनाव रचून भाविकांच्या श्रद्धेचा गैरफायदा घेणाऱ्या भोंदू अशोक खरात याच्या काळ्या कारनाम्यांचा 'एसआयटी'ने (विशेष तपास पथक) पर्दाफाश केला आहे. महिलांचे लैंगिक शोषण, कुटुंबाला मृत्यूची भीती दाखवून पैशांची उधळपट्टी आणि अंधश्रद्धेचा बाजार मांडणाऱ्या खरातच्या गुन्ह्यांची व्याप्ती मोठी असून, आता या प्रकरणाचा तपास अंमलबजावणी संचालनालयानेही (ED) सुरू केला आहे, अशी खळबळजनक माहिती एसआयटी प्रमुख तेजस्वी सातपुते यांनी पत्रकार परिषदेत दिली.
श्रद्धेचा बाजार आणि दहशतीचा खेळ
अशोक खरात हा नाशिक आणि अहिल्यानगर जिल्ह्यात स्वतःला 'दैवी शक्ती' प्राप्त असल्याचे भासवत होता. ईशानेश्वर मंदिर परिसरात अंधाराचा फायदा घेऊन हातचलाकीने लोकांची दिशाभूल करत असे. तपासादरम्यान ३० हून अधिक साक्षीदारांची चौकशी केली असता, खरात हा खडे, चिंचुके, रुद्राक्ष आणि पूजेच्या विधींच्या नावाखाली भाविकांकडून मोठी रक्कम उकळत असल्याचे समोर आले आहे. धक्कादायक म्हणजे, महिलांना त्यांच्या कुटुंबातील व्यक्तींच्या मृत्यूची भीती दाखवून आणि बदनामीची धमकी देऊन त्याने लैंगिक शोषण केल्याचे ८ गुन्हे दाखल झाले आहेत.
४६५० व्हिडिओ लिंक्स 'डिलिट'
पीडित महिलांचे आक्षेपार्ह व्हिडिओ सोशल मीडियावर प्रसारित करून त्यांना ब्लॅकमेल केले जात होते. एसआयटीच्या सायबर टीमने महाराष्ट्र सायबरच्या मदतीने तब्बल ४६५० व्हिडिओ लिंक्स इंटरनेटवरून हटवल्या आहेत. तसेच, अशा पोस्ट वारंवार टाकणारी ४५१ सोशल मीडिया खाती कायमस्वरूपी बंद करण्यात आली आहेत. व्हिडिओ प्रसारित केल्याप्रकरणी सातपूर आणि कोपरगाव पोलीस ठाण्यात स्वतंत्र गुन्हे दाखल असून, आतापर्यंत ६ जणांना अटक करण्यात आली आहे.
आर्थिक गैरव्यवहाराचा 'ईडी'कडून तपास
अशोक खरातने जमवलेली मालमत्ता आणि त्याचे आर्थिक व्यवहार संशयास्पद असल्याने 'ईडी'ने या प्रकरणात उडी घेतली आहे. एसआयटीने खरातच्या प्रॉपर्टीशी संबंधित सर्व माहिती ईडीला सुपूर्द केली असून, भविष्यात त्याच्या आर्थिक साम्राज्याचीही चौकशी होणार आहे. खरात सध्या पोलीस कोठडीत असून त्याची कोठडी संपल्यानंतर इतर गुन्ह्यांतही त्याला अटक करण्याची प्रक्रिया सुरू राहणार आहे.
२४ अधिकाऱ्यांचे विशेष पथक
पोलीस महासंचालकांच्या आदेशानुसार २० मार्चपासून या प्रकरणाचा तपास 'एसआयटी'कडे सोपवण्यात आला आहे. या पथकात २ पोलीस उपअधीक्षक, ३ पोलीस निरीक्षक, १० उपनिरीक्षक आणि अंमलदारांसह एकूण २४ पोलीस कर्मचाऱ्यांचा समावेश आहे.
नागरिकांना आवाहन
"भारतीय राज्यघटनेच्या कलम ५१-अ नुसार वैज्ञानिक दृष्टिकोन ठेवणे हे प्रत्येकाचे कर्तव्य आहे. कोणाच्याही भूलथापांना बळी पडू नका. भोंदूगिरी आणि अंधश्रद्धेच्या विरोधात समाजाने सतर्क राहण्याची गरज आहे."
— तेजस्वी सातपुते (प्रमुख, एसआयटी)
तपासाचे महत्त्वाचे मुद्दे
एकूण गुन्हे:* १२ (९ गुन्ह्यांचा तपास एसआयटीकडे).
पीडितांचे शोषण:* ८ लैंगिक अत्याचाराचे गुन्हे दाखल.
आरोपींची स्थिती:* अशोक खरात ८ एप्रिलपर्यंत पोलीस कोठडीत.
कारवाई:* आक्षेपार्ह मजकूर पसरवणारी ४५१ सोशल मीडिया खाती बंद.