नाशिक, (प्रतिनिधी) ७ एप्रिल - चमत्कार आणि वशीकरणाच्या नावाखाली महिलांचे शोषण करणाऱ्या भोंदूबाबा अशोक खरातच्या काळ्या साम्राज्याचा पर्दाफाश झाला आहे. एसआयटी (SIT) चौकशीत खरातने धक्कादायक कबुली दिली असून, ज्याला लोक 'चमत्कार' समजत होते, ती केवळ 'हातचलाखी' आणि भीती दाखवण्याचे तंत्र होते, असे त्याने मान्य केले आहे. दरम्यान, या प्रकरणातील आर्थिक गैरव्यवहाराची व्याप्ती पाहता आता अंमलबजावणी संचालनालय (ED) देखील मैदानात उतरले असून खरातच्या १०० कोटींच्या बेनामी मालमत्तेची चौकशी सुरू झाली आहे.
'दुनिया झुकती है...' म्हणत दिली गुन्ह्यांची कबुली
सूत्रांनी दिलेल्या माहितीनुसार, एसआयटीच्या कसून चौकशीत अशोक खरातने आपले गुन्हे कबूल केले आहेत. "दुनिया झुकती है, झुकानेवाला चाहिए," असे म्हणत त्याने महिलांना जाळ्यात ओढण्यासाठी विज्ञानाचा आधार घेत केलेल्या क्लृप्त्यांची माहिती दिली. वशीकरण किंवा दैवी शक्ती नसून केवळ हातचलाखीने महिलांना धमकवून त्यांचे शारीरिक आणि मानसिक शोषण केल्याचे त्याने मान्य केले आहे. या गुन्ह्यात त्याला आणखी कोणाची मदत मिळाली, याचा तपास आता एसआयटी करत आहे.
१३० बँक खाती आणि ६३ कोटींचे व्यवहार
अशोक खरातचे कारनामे केवळ शोषणापुरते मर्यादित नसून त्याचे आर्थिक जाळे थक्क करणारे आहे. तपासादरम्यान खरातशी संबंधित १३० हून अधिक बँक खात्यांची माहिती समोर आली आहे. यात 'समता नागरी पतसंस्था' आणि इतर सहकारी बँकांचा समावेश आहे. या खात्यांमधून आतापर्यंत ६३ कोटी रुपयांहून अधिक व्यवहार झाल्याचा संशय आहे. धक्कादायक बाब म्हणजे अनेक खात्यांवर खरातचे नाव 'नॉमिनी' म्हणून असून ती खाती त्याच्याच मोबाईल नंबरवरून हाताळली जात होती.
पुण्यातील १०० कोटींच्या मालमत्तेवर ED ची नजर
खरातचे पुण्यातील कोरेगाव पार्क येथील कनेक्शनही समोर आले आहे. त्याचा चार्टर्ड अकाउंटंट प्रकाश पोफळे याच्या नावावर १८ रो-हाऊस आणि ४९ गुंठे जमीन खरेदी करण्यात आली आहे. कागदोपत्री याची किंमत १९.५६ कोटी असली तरी बाजारमूल्य १०० कोटींच्या वर असल्याचा अंदाज आहे. याशिवाय नाशिक, सिन्नर आणि शिर्डी येथील ५२ हून अधिक जमिनींची ईडी चौकशी करणार आहे. युएईपर्यंत (UAE) पसरलेल्या 'हवाला' रॅकेटमध्ये खरातचा सहभाग असल्याची शक्यता वर्तवण्यात येत आहे.
एसआयटी प्रमुख तेजस्वी सातपुते घेणार पत्रकार परिषद
या प्रकरणाचे गांभीर्य लक्षात घेऊन एसआयटी प्रमुख तेजस्वी सातपुते आज सायंकाळी पत्रकार परिषद घेणार आहेत. सरकारवाडा पोलीस ठाण्यात दाखल असलेल्या गुन्ह्याबाबत आणि आतापर्यंत झालेल्या तपासातील महत्त्वाचे धागेदोरे त्या माध्यमांसमोर मांडणार आहेत. खरातच्या पोलीस कोठडीची मुदत ८ एप्रिलला संपत असून, त्यापूर्वी होणारी ही पत्रकार परिषद अत्यंत महत्त्वाची मानली जात आहे.
तपासाचे प्रमुख मुद्दे:
* शोषण: वशीकरणाच्या नावाखाली महिलांचे लैंगिक शोषण केल्याची कबुली.
* आर्थिक गैरव्यवहार: १३० बँक खात्यांमार्फत कोट्यवधींची उलाढाल.
* बेनामी गुंतवणूक: सीए प्रकाश पोफळेच्या नावावर पुण्यात रो-हाऊस आणि जमिनी.
* हवाला कनेक्शन: पैशांची अफरातफर थेट युएईपर्यंत पोहोचल्याचा संशय.