मुंबई, (प्रतिनिधी) ३० मार्च - बॉलिवूडची 'स्टाईल आयकॉन' म्हणून ओळखली जाणारी अभिनेत्री सोनम कपूर दुसऱ्यांदा आई झाली आहे. सोनम आणि तिचा पती आनंद आहुजा यांनी त्यांच्या दुसऱ्या मुलाचे जगात स्वागत केले आहे. वयाच्या ४० व्या वर्षी सोनमने दुसऱ्या मुलाला जन्म दिला असून, या वृत्तामुळे कपूर आणि आहुजा कुटुंबासह चित्रपट सृष्टीत आनंदाची लाट पसरली आहे.
सोनम कपूर आणि व्यावसायिक आनंद आहुजा यांनी २०१८ मध्ये विवाहगाठ बांधली होती. त्यानंतर २०२२ मध्ये त्यांना 'वायु' हा पहिला मुलगा झाला. आता दोन वर्षांनंतर त्यांच्या आयुष्यात दुसऱ्या मुलाचे आगमन झाले आहे. सोनमने तिच्या मातृत्वाचा हा टप्पा अत्यंत सकारात्मकतेने अनुभवला असून, या वयात आई होण्याचा तिचा निर्णय अनेक महिलांसाठी प्रेरणादायी मानला जात आहे.
सोशल मीडियावर शुभेच्छांचा वर्षाव
सोनम आई झाल्याची बातमी वाऱ्यासारखी पसरताच सोशल मीडियावर चाहत्यांनी आणि बॉलिवूडमधील सेलिब्रिटींनी शुभेच्छांचा वर्षाव केला आहे. अनिल कपूर यांनी पुन्हा एकदा आजोबा झाल्याचा आनंद व्यक्त केला असून, लवकरच या चिमुकल्याचे नाव काय ठेवले जाणार, याकडे सर्वांचे लक्ष लागले आहे.
सोनम कपूर गेल्या काही काळापासून मोठ्या पडद्यापासून लांब असली तरी सोशल मीडियाच्या माध्यमातून ती चाहत्यांच्या संपर्कात होती. दुसऱ्या गरोदरपणाच्या काळातही तिने तिचे विविध फोटो शेअर करत हा प्रवास चाहत्यांसोबत साजरा केला होता.