जळगाव, (प्रतिनिधी) २४ मार्च - सद्यस्थितीत जळगाव शहर आणि जिल्ह्यातील काही पेट्रोल पंपांवर पेट्रोल संपल्याच्या अफवा सोशल मीडियावर पसरत आहेत. यामुळे नागरिकांमध्ये भीतीचे वातावरण निर्माण होऊन पेट्रोल पंपांवर मोठी गर्दी पाहायला मिळत आहे. मात्र, जिल्हा प्रशासनाने या सर्व चर्चा फेटाळून लावल्या असून जिल्ह्यात पेट्रोल आणि डिझेलचा पुरेसा साठा उपलब्ध असल्याचे स्पष्ट केले आहे.
पुरवठा साखळी सुरळीत
जिल्हाधिकारी तथा जिल्हादंडाधिकारी यांनी दिलेल्या प्रसिद्धी पत्रकानुसार, जळगाव शहर व जिल्ह्यात इंधन पुरवठा साखळी पूर्णपणे सुरळीत आहे. पेट्रोल-डिझेलचा कोणताही तुटवडा भासणार नाही याची दक्षता संबंधित यंत्रणेमार्फत घेतली जात आहे. नागरिकांनी नाहक भीतीपोटी इंधनाचा साठा करण्यासाठी पंपांवर गर्दी करू नये, असे आवाहन प्रशासनाने केले आहे.
अफवा पसरवणाऱ्यांचा खैर नाही
सोशल मीडियाच्या माध्यमातून चुकीची माहिती किंवा संदेश पसरवणे हा कायद्याने गुन्हा आहे. जे लोक इंधन टंचाईबाबत जाणीवपूर्वक अफवा पसरवून गोंधळ निर्माण करतील, त्यांच्यावर कठोर कायदेशीर कारवाई करण्याचे निर्देश जिल्हा प्रशासनाने दिले आहेत.
प्रशासनाच्या सूचना:
सोशल मीडियावरील अनधिकृत संदेशांवर विश्वास ठेवू नका.
एकाच वेळी मोठ्या प्रमाणात इंधन खरेदी करून साठा करू नका.
पेट्रोल पंपांवर गर्दी करून वाहतुकीला अडथळा निर्माण करू नका.
काहीही शंका असल्यास अधिकृत शासकीय माध्यमांकडूनच माहितीची खातरजमा करा.
जिल्ह्यात कायदा व सुव्यवस्था राखण्यासाठी नागरिकांनी संयम पाळावा आणि प्रशासनाला सहकार्य करावे, असे आवाहन जिल्हाधिकारी कार्यालयामार्फत करण्यात आले आहे.