पुणे, (प्रतिनिधी) १६ मार्च - प्रशासनाने घालून दिलेले नियम हे केवळ सामान्य भाविकांसाठीच असतात की काय, असा संतप्त सवाल आता उपस्थित केला जात आहे. भीमाशंकर मंदिर विकासकामासाठी तब्बल तीन महिने बंद ठेवण्याचे आदेश जिल्हाधिकाऱ्यांनी दिलेले असताना, झारखंडमधील भाजप खासदार डॉ. निशिकांत दुबे यांच्यासाठी शनिवारी (१४ मार्च) प्रशासनाने हे नियम धाब्यावर बसवून मंदिराचे दरवाजे उघडले. या प्रकारामुळे स्थानिकांसह भाविकांमध्ये तीव्र संतापाची लाट उसळली आहे.
नेमका प्रकार काय?
भीमाशंकर मंदिराच्या सभामंडप आणि पायरी मार्गाच्या बांधकामाचे काम सध्या युद्धपातळीवर सुरू आहे. सुरक्षेच्या कारणास्तव आणि कामात अडथळा नको म्हणून पुणे जिल्हाधिकाऱ्यांनी ९ जानेवारी ते ९ एप्रिल २०२६ या कालावधीत मंदिर सर्वसामान्यांसाठी पूर्णपणे बंद ठेवण्याचे आदेश दिले होते. मात्र, शनिवारी दुपारी २ च्या सुमारास खासदार डॉ. निशिकांत दुबे हे आपल्या कुटुंबीय आणि नातेवाईकांसह थेट हेलिकॉप्टरने भीमाशंकरमध्ये दाखल झाले. प्रशासनाने कोणतीही आडकाठी न आणता त्यांच्यासाठी विशेष दर्शनाची व्यवस्था केली.
प्रशासनाचा दुजाभाव चर्चेत
गेल्या दोन-अडीच महिन्यांपासून शेकडो भाविक दुरूनच कळसाचे दर्शन घेऊन परत जात आहेत. स्थानिकांचा व्यवसायही मंदिर बंद असल्याने ठप्प झाला आहे. अशा परिस्थितीत एका लोकप्रतिनिधीसाठी नियम शिथिल केले गेल्याने प्रशासनाच्या भूमिकेवर प्रश्नचिन्ह उपस्थित केले जात आहे.
नियम मोडला की वाकवला? जिल्हाधिकाऱ्यांच्या लेखी आदेशाचे उल्लंघन कोणाच्या सांगण्यावरून झाले?
सुरक्षेचा प्रश्न: जर बांधकाम सुरू असताना सामान्यांना प्रवेश नाकारला जातो, तर खासदारांच्या कुटुंबासाठी ती जागा सुरक्षित कशी ठरली?
स्थानिकांमध्ये रोष
"आम्ही नियमांचे पालन करतोय, पण सत्ताधाऱ्यांच्या दबावाखाली प्रशासन झुकत असेल तर हे दुर्दैवी आहे. हा सर्वसामान्यांच्या श्रद्धेचा अपमान आहे," अशी भावना एका स्थानिक ग्रामस्थाने व्यक्त केली. या प्रकरणावर आता जिल्हा प्रशासन काय स्पष्टीकरण देते, याकडे सर्वांचे लक्ष लागले आहे.