मुंबई, (प्रतिनिधी) ८ मार्च - राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी प्रफुल्ल पटेल यांच्यावर अत्यंत गंभीर स्वरूपाचे आरोप करत त्यांना जाहीर आव्हान दिले आहे. उपमुख्यमंत्री अजित पवार यांच्या अपघाताला किंवा घातपाताला कारणीभूत असलेल्या कंपनीच्या मालकाच्या मुलाच्या लग्नाला पटेल उपस्थित होते का, असा टोकदार प्रश्न विचारत पवारांनी राजकीय वर्तुळात मोठी खळबळ उडवून दिली आहे.
नेमका वाद काय?
रोहित पवार यांनी सोशल मीडियाच्या माध्यमातून प्रफुल्ल पटेल यांना थेट लक्ष्य केले. अजित पवार यांच्या अपघाताशी ज्या 'VSR' कंपनीचे नाव जोडले जात आहे, त्या कंपनीच्या मालकाचा मुलगा रोहित सिंग याच्या लग्नाचा संदर्भ रोहित पवारांनी दिला आहे. हे लग्न राजस्थानमध्ये पार पडले असून, या विवाह सोहळ्याला प्रफुल्ल पटेल उपस्थित होते का, असा प्रश्न त्यांनी विचारला आहे.
'तुम्ही स्वार्थी की अजितदादा प्रेमी?'
रोहित पवार यांनी केवळ उपस्थितीवरच प्रश्नचिन्ह उपस्थित केले नाही, तर पटेलांना नैतिकतेच्या कठड्यात उभे केले आहे. "जर तुम्ही त्या लग्नाला गेला असाल, तर तिथे इतर कोणकोणते नेते होते आणि ते कोणत्या पक्षाचे होते, हे तुम्हाला नक्कीच माहित असेल. ती माहिती आता तुम्ही महाराष्ट्राच्या जनतेला सांगावी," अशी मागणी पवारांनी केली आहे.
पटेलांच्या भूमिकेवर शंका उपस्थित करताना रोहित पवार पुढे म्हणाले की, "तुम्ही खरोखरच 'अजितदादा प्रेमी' आहात की केवळ स्वतःच्या हितासाठी 'स्वार्थी' राजकारण करत आहात, हे आता महाराष्ट्राला दाखवून देण्याची वेळ आली आहे."
राजकीय परिणामांची शक्यता
अजित पवार यांच्या अपघाताच्या प्रकरणाला आता या आरोप-प्रत्यारोपामुळे पूर्णपणे राजकीय वळण लागले आहे. यावर आता प्रफुल्ल पटेल किंवा राष्ट्रवादी काँग्रेसचा (अजित पवार गट) काय खुलासा येतो, याकडे संपूर्ण राज्याचे लक्ष लागले आहे. विशेषतः 'त्या' कंपनीच्या मालकाशी कोणाचे लागेबांधे आहेत, यावरून येत्या काळात सत्ताधारी आणि विरोधकांमध्ये मोठा कलगीतुरा रंगण्याची चिन्हे आहेत.
या संदर्भात प्रफुल्ल पटेल यांची बाजू अद्याप स्पष्ट झालेली नसून, त्यांच्या प्रतिसादानंतर या प्रकरणातील पुढील सत्य समोर येईल.