मुंबई, (प्रतिनिधी) २३ फेब्रुवारी - महाराष्ट्र नवनिर्माण सेनेचे अध्यक्ष राज ठाकरे हे त्यांच्या राजकीय शैलीसोबतच त्यांच्यातील कलाकारासाठीही ओळखले जातात. नुकतीच त्यांनी आपल्या संग्रहातील एका जुन्या पुस्तकाच्या निमित्ताने मराठी रंगभूमीच्या सुवर्णकाळातील एक अत्यंत दुर्मीळ आणि वैयक्तिक आठवण चाहत्यांशी शेअर केली आहे. ज्येष्ठ नाटककार वसंत कानेटकर यांच्या 'सुख पाहता' या नाटकाच्या पुस्तकाचे मुखपृष्ठ स्वतः राज ठाकरे यांनी साकारले होते, या जुन्या आठवणीला त्यांनी उजाळा दिला आहे.
काय आहे हा किस्सा?
राज ठाकरे यांनी समाजमाध्यमावर पोस्ट करत सांगितले की, "काही दिवसांपूर्वी लायब्ररीत पुस्तक शोधत असताना अचानक 'सुख पाहता' हे नाटक सापडले. हे पुस्तक पाहताच मी भूतकाळात गेलो, कारण याचे मुखपृष्ठ मी केले होते." १९८९ सालची ही आठवण आहे. राज ठाकरे यांचे सासरे आणि ज्येष्ठ नाट्यनिर्माते मोहन वाघ यांनी राज ठाकरेंना सांगितले होते की, 'सुख पाहता' या नाटकाचे पुस्तक काढावे अशी कानेटकरांची इच्छा आहे आणि त्याचे मुखपृष्ठ तुम्हीच करावे, असा आग्रह त्यांनी धरला होता.
एका दिवसात साकारले मुखपृष्ठ
त्या काळात राज ठाकरे 'सामना', 'मार्मिक' आणि 'लोकसत्ता'साठी व्यंगचित्रं काढत असत. नाटकाच्या पुस्तकाचे मुखपृष्ठ करणे हा त्यांच्यासाठी नवा अनुभव होता. कामाला सुरुवात करण्यापूर्वी त्यांनी शिवाजी मंदिर येथे जाऊन हे नाटक पाहिले. "या नाटकात यशवंत दत्त यांनी साकारलेली सहा पात्रे पाहून मी थक्क झालो होतो," असे त्यांनी आवर्जून नमूद केले. हे नाटक पाहिल्यानंतर अवघ्या एका दिवसात त्यांनी मुखपृष्ठ तयार केले, जे वसंत कानेटकर आणि मोहन वाघ या दोघांनाही प्रचंड आवडले.
मराठी रंगभूमीबद्दल व्यक्त केली सदिच्छा
मराठी नाट्यसृष्टीतील मानदंड मानल्या जाणाऱ्या व्यक्तींकडून मिळालेली ती पोचपावती आपल्यासाठी आशीर्वादासारखी होती, अशी भावना राज ठाकरे यांनी व्यक्त केली. हा जुना इतिहास उलगडताना त्यांनी मराठी प्रेक्षकांसाठी एक इच्छाही व्यक्त केली. "मराठी रंगभूमीवर 'हाऊसफुल'चा बोर्ड कायम झळकत राहू दे आणि नाट्यानुभवासोबतच नाटकाचे पुस्तक वाचण्याचा काळ पुन्हा येऊ दे," अशी सदिच्छा त्यांनी व्यक्त केली आहे.
राज ठाकरे यांनी शेअर केलेले हे मुखपृष्ठ आणि त्यामागची गोष्ट सध्या सोशल मीडियावर चर्चेचा विषय ठरली असून, जुन्या जाणत्या नाट्यरसिकांच्या आठवणी यामुळे पुन्हा ताज्या झाल्या आहेत.
?s=20
