नाशिक, (प्रतिनिधी), २० फेब्रुवारी - गोदावरी नदीपात्रात गुरुवारी (दि. १९) दोन वेगवेगळ्या ठिकाणी दोघांचे मृतदेह आढळून आल्याने परिसरात खळबळ उडाली आहे. या दोन्ही व्यक्तींची अद्याप ओळख पटलेली नसून, पंचवटी पोलीस ठाण्यात आकस्मिक मृत्यूची नोंद करण्यात आली आहे.
व्हिक्टोरिया पुलाखाली तरुणाचा मृतदेह
मिळालेल्या माहितीनुसार, गुरुवारी सकाळच्या सुमारास व्हिक्टोरिया पुलाखाली एक २५ ते ३० वयोगटातील तरुण मृतावस्थेत तरंगताना आढळून आला. स्थानिक नागरिकांनी माहिती दिल्यानंतर अग्निशमन दलाच्या जवानांनी घटनास्थळी धाव घेत मृतदेह बाहेर काढला. या तरुणाची ओळख पटवण्याचे काम सुरू आहे. पोलीस अंमलदार रमेश देवरे यांनी दिलेल्या खबरीवरून नोंद करण्यात आली असून, हवालदार आहिरे अधिक तपास करत आहेत.
अमरधाम परिसरात दुसरी घटना
दुसरी घटना पंचवटीतील अमरधाम परिसरातील गोदापात्रात घडली. येथे साधारण ४० ते ४५ वयोगटातील एका प्रौढ व्यक्तीचा मृतदेह पाण्यावर तरंगताना दिसून आला. पोलिसांनी जीवरक्षक आणि अग्निशमन दलाच्या मदतीने हा मृतदेह बाहेर काढला. या प्रकरणी हवालदार निलेश चव्हाण यांनी दिलेल्या खबरीवरून मृत्यूची नोंद करण्यात आली असून, पुढील तपास हवालदार सानप करत आहेत.
चर्चेला उधाण: या दोन्ही घटना आत्महत्या आहेत की घातपात, याबाबत परिसरात विविध चर्चांना उधाण आले आहे. पोलीस सध्या मयतांच्या वारसांचा शोध घेत असून, शवविच्छेदन अहवालानंतरच मृत्यूचे नेमके कारण स्पष्ट होणार आहे.
