जळगाव, (प्रतिनिधी) १० फेब्रुवारी मुंबई येथे होणाऱ्या आगामी अॅग्री-AI (Agri-AI) शिखर परिषदेच्या पार्श्वभूमीवर तसेच आंतरराष्ट्रीय महिला वर्षानिमित्त, राज्यातील महिला शेतकऱ्यांचा डिजिटल समावेश वाढविण्यासाठी दि. १० ते १४ फेब्रुवारीदरम्यान “महाविस्तार-AI द्वारे महिला शेतकऱ्यांचा डिजिटल समावेश” ही विशेष राज्यव्यापी मोहीम राबविण्यात येणार आहे. शेती व संलग्न कामांमध्ये महिलांचे योगदान अत्यंत महत्त्वाचे असतानाही त्यांना वेळेवर व विश्वासार्ह कृषी माहितीचा पुरेसा लाभ मिळत नसल्याची दरी भरून काढणे, हा या मोहिमेचा मुख्य उद्देश आहे.
महाविस्तार-AI (MahaVISTAAR-AI) शेतकरी अॅपच्या माध्यमातून पीक अवस्थेनुसार सल्ला, स्थानिक हवामानावर आधारित मार्गदर्शन, कीड व रोगांबाबत तात्काळ इशारे तसेच एआय-आधारित चॅटबॉटद्वारे सोप्या भाषेत कृषी सल्ला उपलब्ध करून देण्यात येणार आहे. कीड-रोग ओळखीसाठी छायाचित्रावर आधारित प्रणाली व व्हॉईस-आधारित सेवा विकसित करण्यात येत असून, त्यामुळे महिला शेतकऱ्यांसाठी अॅपचा वापर अधिक सुलभ होणार आहे. मोहिमेदरम्यान प्रत्येक गावात महिला शेतकऱ्यांसाठी विशेष प्रात्यक्षिके आयोजित केली जाणार आहेत. जमीन मालकी हक्काचा विचार न करता शेती किंवा संबंधित कृषी कामात सहभागी असलेली कोणतीही महिला ‘महिला शेतकरी’ म्हणून पात्र राहणार असल्याचे स्पष्ट करण्यात आले आहे.
स्मार्टफोन नसलेल्या महिलांसाठी गट-आधारित प्रशिक्षणाची व्यवस्था करण्यात येणार असून, कृषी ताई, कृषी सखी, पशुसखी, महिला बचत गट, स्वयंसेवी संस्था, पोक्रा व इतर योजनांतील शेतीशाळा तसेच कृषी व कृषी विज्ञान महाविद्यालयीन विद्यार्थ्यांच्या सहभागातून ही मोहीम प्रभावीपणे राबविण्यात येणार आहे. महिला शेतकऱ्यांच्या गरजेनुसार कार्यक्रमांचे नियोजन करण्यात येणार असून, महाविस्तार अॅपची माहिती देणारे लघु व्हिडिओ सोशल मीडियाच्या माध्यमातूनही प्रसारित केले जाणार आहेत. या उपक्रमामुळे राज्यातील महिला शेतकऱ्यांचा अर्थपूर्ण डिजिटल समावेश साध्य होईल, असा विश्वास विभागीय कृषी सहसंचालक संभाजी ठाकूर यांनी व्यक्त केला आहे.
